Mòstra virtuala Occitan, Occitania 2/22 OC

2/22 OC
 Seleccionar la lenga

 

 

 

                            La cultura occitana

 

          

 

   La lenga                 

 

La literatura occitana

 

 L'occitan a l'escòla

Cants,  gastronomia, 

jòcs occitans e quiz

 

 

Aquesta mòstra virtuala ven en seguida de la mòstra "Occitan, Occitanie" presentada als Archius departementals d'Aude del 14 de febrièr al 4 de julh de 2017. A per tòca de perennizar la mòstra d'un biais numeric. Occitania es una zòna linguistica, culturala e istorica que cobrís la mai bèla part del sud de França e que serviguèt a balhar un nom a la region administrativa en 2016. Per l'entremesa de quatre tèmas, los legeires poiràn descobrir o tornar descobrir los multiples aspèctes de la cultura occitana. Tenèm a mercejar l'Institut d'Estudis Occitans-Aude e son animator, Alan Roch, per la revirada dels tèxtes en occitan. 

 

 

Mòstra Occitan, Occitania (2017)

 

La lenga : Dins aqueste tèma, l’accent es mes sus çò qu'es la lenga occitana : sa denominacion que cambièt d'un sègle l'autre ; sa riquesa e sa diversitat que la pluralitat dels dialèctes ne pòrta testimòni. De l'Edat mejana a l'ora d'ara, l'occitan s'impausèt dins lo sud de França entre lo latin e lo francés. En s'apiejant suls tèxtes ancians, se pòt percebre l'evolucion de son utilizacion. Al sègle 19, la presa de consciéncia de l'aflaquiment de l'escrit occitan menèt a un subresaut e un reviscòl de la lenga. L'iniciativa d'aquesta entrepresa reven a una associacion literària, fondada al mitan del sègle : lo Felibrige.

 

 

La literatura occitana : La segonda part propòsa un agach mai fin sus aquesta associacion, lo Felibritge, per l'evocacion de son espelida, son evolucion e sos membres. Las fèstas felibrencas fan part, coma los concorses literaris, de las manifestacions culturalas caracteristicas del moviment. Es l'escasença d'apregondir lo subjècte per conéisser l'importància d'aquelas fèstas e ne comprene lo sens. Aqueste tèma compren tanben una part consacrada a la poësia occitana que serà mesa en abans amb unes tèxtes del poèta occitan Renat Nèlli, audenc nascut a Carcassona.

 

 

L'occitan a l'éscola : Aqueste tèma parla dels moments de refús e d'acceptacion de la lenga dins l'encastre escolar : de l'abat Grégoire que desira l'avaliment dels pateses a la fin del sègle 18 a la mesa en plaça actuala de la  calandreta, escòla que practica l’aprendissatge de l’occitan per immersion. Entre aqueles dos punts que bòrnan cronologicament lo tèma, òm s’interessarà a las leis que reglèron l'ensenhament de la lei Guizot a la lei Ferry. Se balharà unes apercebuts de la plaça de l'occitan a l'escòla jos la Tresena Republica e jol regime de Vichei. Enfins, una pagina consacrada al retorn de las revendicacions linguisticas permetrà de melhor comprene l'evolucion contemporanèa de l'ensenhament de l’occitan.

 

 

Cants, gastronomia, jòcs occitans e quiz : Lo darnièr tèma, consacrat a la cultura occitana, propòsa de metre en abans los cants occitan e de descobrir atal la « bèla lenga ». Doas recèptas mesas a vòstra disposicion vos permetràn de presar los plats del país e de vos ensajar a la gastronomia e al biais de viure occitans. Unes jòcs occitans per pichons e grands son de descobrir o de tornar descobrir.

 

 

Son associats aaquesta mòstra virtuala los panèls de la mòstra (que vendrà passejaira a comptar del mes de julh de 2017), disponibles jos format PDF, amb unes ligams audio :  quichar aici.

Cada panèl es disponible en doas versions (francesa e occitana).

 

 

 

RETORN
 
 

Rubrique: